Vətənim Media xəbər verir ki, bəstəkar Aydın Əzim Bakı Musiqi Akademiyasında Qara Qarayevin dərs dediyi tarixi sinifdə təhsil aldığını və bəstəkarın məzunları ilə çəkilmiş fotoda özünün də yer aldığını bildirib. Əməkdar incəsənət xadimi bu xatirələri “Əsrin yaşıdı” layihəsi çərçivəsində danışıb.
1946-cı ildə Bakıda doğulan Əzim A. Zeynallı adına Musiqi Texnikumunu, daha sonra Üzeyir Hacıbəyov adına Azərbaycan Dövlət Konservatoriyasının bəstəkarlıq fakültəsini Qara Qarayevin sinfində bitirib. O, Üzeyir Hacıbəyovun Azərbaycan bəstəkarlıq məktəbinin yaradılmasındakı rolundan söz açaraq, bəstəkarın Cövdət Hacıyev və Qara Qarayevin Moskvada təhsil almasına şərait yaratdığını qeyd edib.
Əzim 1968–1996-cı illərdə Azərbaycan Dövlət Teleradio Komitəsində müxtəlif vəzifələrdə çalışıb, 1996–2005-ci illərdə Türkiyənin Mersin Universitetində işləyib. Hazırda Bakı Musiqi Akademiyasının Bəstəkarlıq kafedrasının professorudur. Müsahibədə o, həmçinin Bakı və Əmircanla bağlı ailə xatirələrini bölüşüb.
Əsas mənbə: APA