Vətənim Media xəbər verir ki, 2025-ci ilin oktyabrından Rusiyada xarici SIM kart və eSIM-lər şəbəkəyə ilk dəfə qoşulduqdan sonra 24 saat ərzində mobil internet və SMS xidməti göstərmir. Zəng etmək isə mümkündür. Qayda Azərbaycan nömrələrinin rouminqinə də aiddir. Səfərdən əvvəl xəritələri, biletləri və rezervasiyaları telefona yükləmək tövsiyə olunur.
Dövlət Statistika Komitəsinin məlumatına görə, bu ilin yanvar-avqust aylarında xaricə səfər edən 1 milyon 384,5 min Azərbaycan vətəndaşının 43,9 faizi Türkiyəyə, 14,8 faizi Rusiyaya, 12,8 faizi Gürcüstana gedib. Bu ölkələrdə internet üçün operatorun rouminq paketindən və ya səyahət eSIM-indən istifadə etmək mümkündür. Türkiyə üçün eSIM-i səfərdən əvvəl quraşdırmaq, Gürcüstanda isə xətti sərhədi keçdikdən sonra aktivləşdirmək olar.
Avropanın bir neçə ölkəsinə səfər edənlər regional eSIM seçə bilərlər. Telefonda *#06# yığdıqda 32 rəqəmli EID görünürsə, cihaz eSIM-i dəstəkləyir. eSIM-i Wi-Fi-a qoşulmuş halda əvvəlcədən quraşdırmaq, əsas SIM kartda isə gözlənilməz xərclərin qarşısını almaq üçün data rouminqini söndürmək məsləhətdir.
Əsas mənbə: APA