Vətənim Media xəbər verir ki, APA-nın Baş Prokurorluğun Mətbuat xidmətinə istinadən yaydığı məlumata görə, “Şəki Yaylası” istirahət mərkəzində baş verən və iki nəfərin ölümü ilə nəticələnən hadisə üzrə iki nəfər həbs olunub. Hadisə sentyabrın 8-də Şəkinin Baş Kəldək kəndində qeydə alınıb. Ucal Bayramov və Coşqun Məmmədzadə kanatdan yıxılaraq aldıqları xəsarətlərdən hadisə yerində ölüblər.
İstintaqın versiyasına görə, mərkəzi idarə edən sahibkar Ramiz Hüseynov zipline qülləsinin tikintisini müvafiq lisenziyası və xüsusi təhsili olmayan Abasət Paşayevə həvalə edib. Qüllədəki dəmir konstruksiyanın deformasiyası kanatlarda dalğalanmaya səbəb olub. Təhlükəsizlik və tormozlama vasitələrinin kustar üsulla hazırlanması nəticəsində zipline qurğusunun parça hissəsi cırılıb.
Noyabrın 2-də Hüseynov səhlənkarlıq, Paşayev isə ehtiyatsızlıqdan iki və ya daha çox şəxsi öldürmə maddəsi ilə təqsirləndirilən şəxs qismində cəlb edilib. Şəki Rayon Məhkəməsinin qərarları ilə hər ikisi barəsində həbs qətimkan tədbiri seçilib. İbtidai istintaq davam edir.
Əsas mənbə: APA