Vətənim Media xəbər verir ki, APA-nın təhlilində Prezident İlham Əliyevin noyabrın 12-də Dublində keçirilən Avropa Siyasi Birliyinin 9-cu Zirvə Toplantısında iştirakının Azərbaycanın Avropadakı siyasi və iqtisadi mövqelərinin möhkəmlənməsi baxımından əhəmiyyətli olduğu bildirilir. Təhlildə qeyd olunur ki, toplantının enerji təhlükəsizliyi, nəqliyyat bağlantıları və regional təhlükəsizlik gündəliyi Azərbaycanın bu sahələrdəki layihələri ilə səsləşib.
Təhlilə əsasən, sammit çərçivəsində İlham Əliyevin Ermənistanın Baş naziri Nikol Paşinyan və Avropa İttifaqı Şurasının Prezidenti Antonio Koşta ilə görüşlərində sülh prosesi, sərhədlərin delimitasiyası, Orta Dəhliz və Naxçıvan dəmir yolu layihəsi müzakirə olunub. Prezidentin açıqladığı məlumata görə, Azərbaycan 2022-ci ildən Avropa İttifaqına qaz tədarükünü ildə 8 milyard kubmetrdən 13 milyard kubmetrə çatdırıb və hazırda İttifaqın 10 üzv dövlətini qazla təmin edir. Təhlildə, həmçinin, Dublində Böyük Britaniya ilə Strateji Tərəfdaşlıq haqqında Birgə Bəyannamənin mübadiləsi ayrıca siyasi nəticə kimi qiymətləndirilir.
APA-nın təhlilində bildirilir ki, İlham Əliyev və Paşinyan 2025-ci il avqustun 8-də Vaşinqtonda əldə olunmuş razılaşmalar əsasında sülh prosesi, iqtisadi-ticarət əlaqələri və TRIPP layihəsinin dəmir yolu və avtomobil yolu komponentlərini müzakirə ediblər. Rəsmi məlumata əsasən, Azərbaycan ərazisindən Ermənistana daşınan yüklərin həcmi 105 min tona çatıb.
Əsas mənbə: APA
