Vətənim Media xəbər verir ki, əməkdar elm xadimi, professor Qəzənfər Paşayev məktəblərdə vahid geyim formasının tətbiqini dəstəkləyib. O bildirib ki, şagirdlərin dərsə müəyyən edilmiş məktəbli geyiminə uyğun olmayan tərzdə gəlməsinin əleyhinədir və bütün uşaqların eyni formada təhsil almasını vacib sayır.
Paşayevin fikrincə, məktəb yaşlı uşaqlar dünyanı və dini məsələləri tam dərk etmədikləri üçün tədris prosesində valideynlərin diktəsi ilə deyil, qəbul olunmuş geyim qaydalarına uyğun iştirak etməlidirlər. O, universitet tələbələrinin isə yaşlarına görə şəxsi düşüncə və seçim imkanlarının fərqli olduğunu vurğulayıb.
Professor vahid məktəbli geyiminin İngiltərədə və bir sıra başqa ölkələrdə uzun müddətdir tətbiq edildiyini, bu təcrübənin özünü doğrultduğunu qeyd edib. Paşayev Azərbaycanda da vahid formanın tətbiqini zəruri və təqdirəlayiq addım kimi qiymətləndirib.
Əsas mənbə: APA