Vətənim Media xəbər verir ki, Milli Məclis korrupsiya ilə bağlı məlumat verənlərin həvəsləndirilməsi və müdafiəsi haqqında qanun layihəsini birinci oxunuşda qəbul edib. APA-nın xəbərinə görə, layihə məlumatı təsdiqlənən şəxsə təşkilat rəhbərinin qərarı ilə maddi mükafat verilməsini nəzərdə tutur. Ödəniş təsdiq barədə məlumat verildikdən sonra 10 iş günü ərzində edilməlidir.
Mükafatın məbləği minimum əməkhaqqının 25 mislindən çox ola bilməz. Cinayət işi üzrə müəyyən hallarda məlumat verənə xüsusi müsadirə edilmiş əmlak vəsaitinin, dövlət büdcəsinə ödənişin və ya dövlətə ödənilmiş maddi ziyanın 5 faizi veriləcək. Məlumatla əlaqədar şəxsin, yaxın qohumunun və ya qohumunun həlak olması halında ailəyə 20 min manat, bədən xəsarəti aldıqda isə 10 min manat birdəfəlik müavinət nəzərdə tutulur.
Layihəyə görə, məlumat verənə ödənilən mükafat gəlir vergisindən azad ediləcək. Mükafatın müəyyənləşdirilməsində hüquqpozmanın xarakteri, məlumatın araşdırmaya töhfəsi, zərərin və bərpa olunan aktivlərin məbləği nəzərə alınacaq. Mükafatın rəsmiləşdirilməsi və ödənilməsi konfidensiallıq tələblərinə uyğun aparılmalıdır.
Əsas mənbə: APA