Namiq Həsənov “Tarixi birlikdə öyrənək” layihəsində bu dəfə Fərid Zülfüqar oğlu Musabəyov 1 noyabr 1926-cı ildə Bakı şəhərində doğulub..
Fərid Zülfüqar oğlu Musabəyov 1 noyabr 1926-cı ildə Bakı şəhərində doğulub. Orta təhsilini başa vurduqdan sonra M. Əzizbəyov adına Azərbaycan Sənaye İnstitutunda təhsil alıb.
Ali təhsilini başa vurduqdan sonra tikinti sektorunda əmək fəaliyyətinə başlayıb, qısa müddətdə bacarıqlı mühəndis və təşkilatçı kimi tanınıb. O, müxtəlif tikinti təşkilatlarında usta, karxana rəisi, baş mühəndis və rəhbər vəzifələrdə çalışaraq zəngin istehsalat təcrübəsi qazanıb. 1962-ci ildə Azərbaycan Kommunist Partiyası Mərkəzi Komitəsinin tikinti və şəhər təsərrüfatı şöbəsinin müdiri vəzifəsinə təyin edilib.
1970-ci ilədək bu vəzifədə çalışaraq respublikada şəhərsalma, sənayenin inkişafı, mənzil siyasəti və kommunal təsərrüfatın idarə olunması istiqamətlərində həyata keçirilən dövlət proqramlarının hazırlanması və icrasında yaxından iştirak edib. Bu dövrdə Bakıda və digər şəhərlərdə geniş tikinti işləri aparılıb, sənaye zonaları yaradılıb, kommunal infrastrukturun modernləşdirilməsi istiqamətində mühüm tədbirlər həyata keçirilib. Fərid Musabəyov həmin proseslərin koordinasiyasında və təşkilində fəal iştirak edib.
1970-ci ildə Fərid Musabəyov Azərbaycan SSR tikinti materialları sənayesi naziri təyin edilib. O, 1976-cı ilə qədər bu vəzifədə çalışıb. Nazir kimi fəaliyyəti dövründə tikinti materialları istehsal edən müəssisələrin texniki cəhətdən yenidən qurulmasına, istehsal güclərinin artırılmasına və yeni texnologiyaların tətbiqinə xüsusi diqqət yetirilib.
Onun rəhbərliyi altında sement, dəmir-beton məmulatları, üzlük materialları və digər tikinti məhsullarının istehsal həcmi əhəmiyyətli dərəcədə artırılıb. Bu illərdə Azərbaycanda həyata keçirilən iri sənaye və yaşayış tikintilərinin material təminatında nazirliyin fəaliyyəti mühüm rol oynayıb. Fərid Zülfüqar oğlu Musabəyov dövlət və təsərrüfat idarəçiliyindəki fəaliyyəti ilə yanaşı, Azərbaycan SSR-in ali qanunverici orqanının fəaliyyətində də iştirak edib.
O, Azərbaycan SSR Ali Sovetinin VI, VII və VIII çağırışlarına deputat seçilib. Deputatlıq fəaliyyəti onun respublikanın ictimai-siyasi və sosial-iqtisadi həyatında fəal iştirakını davam etdirməsinə imkan verib. Ali Sovetin deputatı kimi o, respublikanın iqtisadi inkişafı, sənaye və tikinti sahələrinin vəziyyəti, şəhər təsərrüfatı, mənzil və sosial məsələlərlə bağlı müzakirələrdə iştirak edib.
Fərid Musabəyovun deputatlıq fəaliyyəti onun dövlət idarəçiliyində əldə etdiyi zəngin təcrübə ilə sıx bağlı olub. Uzun illər tikinti sahəsində mühəndis və rəhbər vəzifələrdə, daha sonra Azərbaycan KP MK-da məsul vəzifədə, 1970–1976-cı illərdə isə Azərbaycan SSR tikinti materialları sənayesi naziri kimi çalışması ona respublikanın iqtisadi və sosial inkişaf problemlərini həm istehsalat, həm də dövlət idarəçiliyi səviyyəsində qiymətləndirmək imkanı verib. 1976-cı ildə nazir vəzifəsini başa vurduqdan sonra Fərid Musabəyov Azərbaycan Tikinti Materialları Elmi-Tədqiqat İnstitutunun direktoru təyin edilib.
O, 1982-ci ilə qədər bu vəzifədə çalışıb. İnstitutun rəhbəri kimi tikinti materiallarının keyfiyyətinin yüksəldilməsi, yeni texnologiyaların işlənib hazırlanması və istehsalata tətbiqi istiqamətində elmi işlərin genişləndirilməsinə böyük diqqət yetirib. Onun rəhbərliyi dövründə institutun elmi potensialı daha da güclənib.
Fərid Zülfüqar oğlu Musabəyov uzun illər dövlət və təsərrüfat fəaliyyətində qazandığı xidmətlərinə görə ittifaq əhəmiyyətli fərdi təqaüdçü statusu alıb. O, 1997-ci ildə vəfat edib… ALLAH RƏHMƏT ELƏSİN!