Vətənim Media xəbər verir ki, “AzerGold” QSC Daşkəsən rayonunda qeydiyyatda olan şəhid ailələrinin üzvləri üçün Bakıya iki günlük səfər proqramı təşkil edib. Səfər zamanı iştirakçılar şirkətin rəhbərliyi və kollektivi ilə birlikdə Zəfər Muzeyini ziyarət ediblər.
Proqram çərçivəsində Hərbi Qənimətlər Parkına ekskursiya keçirilib, Nizami Kino Mərkəzində “44” bədii filminə baxış təşkil olunub. İştirakçılar Zəfər Muzeyində Vətən müharibəsi və işğaldan azad edilmiş ərazilərdə aparılan quruculuq işlərinə həsr olunmuş ekspozisiyalarla tanış olublar.
“AzerGold”un məlumatına görə, şirkətdə, törəmə cəmiyyətlərində və uzunmüddətli podratçı şirkətlərdə ümumilikdə 350 şəhid ailəsi üzvü və müharibə iştirakçısı çalışır. Şirkət bu şəxsləri təhsil, peşə hazırlığı və sosial dəstək layihələrinə də cəlb edir.
Əsas mənbə: APA