Vətənim Media xəbər verir ki, APA-nın məlumatına görə, Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov VII Ümumdünya Mədəniyyətlərarası Dialoq Forumu çərçivəsində jurnalistlərə açıqlamasında işğaldan azad edilmiş ərazilərdəki bəzi mədəni irs nümunələrinin bərpasında xüsusi yanaşmalar tətbiq olunduğunu bildirib.
Hüseynovun sözlərinə görə, mədəni irsin bərpası üçün Azərbaycanın əvvəlki forumlarda təklif etdiyi yeddi mərhələli yanaşma bu dəfə daha praktik müzakirə olunur. O, nümunə kimi Pənahəli xanın İmarət kompleksini, Ağdam şəhərindəki Cümə məscidini, qoruq statusu almış Tuğ kəndini, Azıx və Tağlar mağaralarını göstərib. Abidənin xüsusiyyətlərindən asılı olaraq konservasiya, əvvəlki vəziyyətinə qaytarma və ya yeni elementlər əlavə etmə üsulları seçilir; qərar hər obyekt üzrə ayrıca təhlildən sonra verilir.
Hüseynov qeyd edib ki, mədəni irsin bərpası Böyük Qayıdış prosesi qədər vacibdir. Onun sözlərinə görə, insanların doğma yurdlarına qayıdışı ilə yanaşı, bu prosesin sosial və mədəni tərəfləri də əhəmiyyət daşıyır.
Əsas mənbə: APA