Vətənim Media xəbər verir ki, Xankəndidə MDB-yə üzv ölkələrin antiinhisar qanunvericiliyinin pozulması hallarının birgə araşdırılması üzrə qərargahın 47-ci iclası keçirilib. APA-nın məlumatına görə, tədbiri Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi təşkil edib.
İclasda Azərbaycan, Belarus, Qazaxıstan, Qırğızıstan, Rusiya, Tacikistan və Özbəkistanın dövlət qurumlarının nümayəndələri, həmçinin MDB və digər regional təşkilatların təmsilçiləri iştirak ediblər. Müzakirələrdə rəqəmsal texnologiyaların rəqabət mühitinə təsiri, maliyyə, səhiyyə, peyk rabitəsi və birja ticarətində antiinhisar nəzarəti, eləcə də birgə araşdırmalar nəzərdən keçirilib. İştirakçılar qərargahın yeni fəaliyyət istiqamətlərini və əməkdaşlığın növbəti addımlarını da müəyyənləşdiriblər.
Qərargah 2006-cı ildə MDB-yə üzv dövlətlərin Antiinhisar Siyasəti üzrə Dövlətlərarası Şurasının qərarı ilə yaradılıb. Onun məqsədi transmilli bazarlarda rəqabətə zidd davranışların birgə araşdırılmasını təmin etmək və üzv ölkələrin rəqabət qurumları arasında əməkdaşlığı gücləndirməkdir.
Əsas mənbə: APA