Vətənim Media xəbər verir ki, Gürcüstanın keçmiş Baş naziri İrakli Qaribaşvilinin işi üzrə məhkəmə prosesi qapalı keçiriləcək. APA-nın yerli bürosunun məlumatına görə, Tbilisi Şəhər Məhkəməsi ittiham tərəfinin vəsatətini təmin edib. Qərara məhkəmə zamanı məxfi məlumatların açıqlana biləcəyi ehtimalı əsas göstərilib. Müdafiə tərəfi isə qapalı proses üçün əsas olmadığını bildirərək vəsatətə etiraz edib.
Məhkəmə Qaribaşvilinin korrupsiya ilə əlaqəli cinayətlərdə ittiham olunduğu işə mahiyyəti üzrə baxmağa başlayıb. O, iclasda iştirak edəcək, tərəflərin çıxışları gözlənilir. İttiham üzrə 11 ildən 15 ilədək həbs cəzası nəzərdə tutulur. Qaribaşvili bu ilin yanvarında xüsusilə külli miqdarda qanunsuz gəlirin leqallaşdırılmasına görə məhkum edilib: prosesual razılaşma əsasında 5 il həbs və 1 milyon lari cərimə alıb.
Əsas mənbə: APA