Vətənim Media xəbər verir ki, Ağdam “İmarət” Tarix-Memarlıq Muzey Kompleksi və Şuşa Dövlət Tarix-Memarlıq Qoruğunun ICESCO-nun İslam Dünyası İrs Siyahısına daxil edilməsinə dair sertifikatlar təqdim olunub.
APA-nın məlumatına görə, İslam Təhsil, Elm və Mədəniyyət Təşkilatının baş direktoru Salem bin Məhəmməd Əl-Malik sertifikatları Bakıda keçirilən VII Ümumdünya Mədəniyyətlərarası Dialoq Forumu çərçivəsində Ağdam, Füzuli və Xocavənd rayonlarında Prezidentin xüsusi nümayəndəsi Emin Hüseynova verib. Əl-Malik təşkilatın Qarabağda irsin qorunması işini yüksək qiymətləndirib və beynəlxalq missiyanın bölgədə apardığı araşdırmalar əsasında iki hesabat hazırladığını bildirib.
ICESCO rəhbərinin sözlərinə görə, nümayəndə heyəti Qarabağa ilk dəfə 2020-ci ildə səfər edib. Daha sonra Fransa, Almaniya, Kolumbiya və başqa ölkələrdən mütəxəssislərin daxil olduğu missiya bölgənin beş ərazisində araşdırma aparıb. İkinci hesabat Azərbaycan Prezidenti İlham Əliyevə təqdim olunub.
Əsas mənbə: APA